Melar í Trékyllisvík

Heimasæturnar fóru í suður á annan í páskum  því spáð var vondu veðri, sem gekk eftir. Bændurnir hér á Melum fóru ekki í fjárhúsin, fyrr en eftir hádegið.

Áfram eru bændur á ferðinni á Sögu, nú var Sauðfjárbændahátið sem var frábærlega vel lukkuð. Þar gátu bændur borið saman bækur sínar og húsfreyjurnar auðvitað líka.

Svo kom Gos 1 á Fimmvörðuhálsi sem var bara byrjunin.  þá kom Gos II í Eyjafjallajökli, sem er miklu alvalegra mál og er ekki séð fyrir endann á. Og áhrif gossins teygja sig víða og með misjafnlega alvarlegum hætti!

Hér varð að hætta við jarðarberjaeftirréttinn á vorhátíð Finnbogastaðaskóla því innflutningur á þeim lá niðri vegna stopulla flugsamgangna!Þetta eru auðvitað smámunir miðað við það sem fólkið sem býr á þessu fallega og grósku mikla svæði  gengur nú í gegnum, sem nú veit ekki hvort það á að fara eða vera.Við sendum öllu þessu fólki vinarkveðjur 

Saumaklúbbarnir eru komnir á fulla ferð, þeir eru kjarninn í menningarlífi sveitarinnar yfir vetramánuðina, og eru að svínvirka. 

Ég gerðist dagamma Jóhönnu Engilráðar, sem er algjör snillingur. Hún kemur tvo daga í pössun í viku, sem er bæði frábært og gefandi.

Skúli Björn er búinn að koma í sveitina. Fyrst einn og svo skrapp hann suður að ná í Brynju systir sína. Þau eru að læra að lesa hjá okkur og miðar það vel. Ég er líka búin að fara suður að hitta hin barnabörnin þannig að það er nóg að gera hjá okkur. Það var haldið herlegheita Þorrablót. Síðan fékk Mæsa frænka að koma í heimsókn í sveitina. Hún fékk að fara í Finnbogastaðaskóla  sem henni fannst mjög skemmtilegt.

Fréttir 23/12 2009

Loksins koma fréttir héðan!

Lífið hefur gengið sinn vanagang. Við fórum með þetta verkefni á frábæra sýningu sem kallaðist Stefnumót á Ströndum. Sýningin var undir styrkri stjórn Ingibjargar Valgeirsdóttur. Þar vorum við með bás til að kynna  ,,Sumardvöl á Melum" og þangað kom margt fólk. Þarna upplifði maður samtakamátt á Ströndum svo um munaði. Við hefðum ekki viljað missa af þessu flotta framtaki.

Síðan tóku við þessi hefðbundnu sveitastörf: smölun - réttir, slátrun, klippingar og tilhleypingar en þess í milli var verið að leita að óskilafé. Síðasta smölun var 16/12 þá var farið á bát yfir í Kamb, þar sem menn settu sig í hættu við að fanga féð.   

Kæru vinir! Við sendum okkar bestu óskir um gleðileg jól og farsælt komandi ár!

Takk fyrir góðar viðtökur á árinu sem er að líða og verið ætíð velkomin í sveitina!

 Badda

Kátu systkinin Aron, Irsa og Eyrún vöknuðu við jarmið í Dísu Ljósálf og Mel. Systkinin fengu sér morgunverð og fóru svo út að gefa heimalningunum, það gekk barasta vel -- nema að þeim fannst lömbin ansi gráðug.

Síðan fórum við  út í Hellisvík sem er fyrir utan Finnbogastaði. Þar fórum við að tína skeljar og fleira dót, við komum heim með fullan bakpoka af allskonar gulli og gersemum. 

Snúðabakstur var í dag og við vorum svo heppin að það komu fimm krakkar í heimsókn til að fá að gefa heimalingunum og allir fengu sér mjólk og snúð og svo léku krakkarnir sér. Fyrir kvöldmat fengu systkinin sér göngu í fjöruna hér fyrir neðan bæinn og þeim fannst öldurnar ótrúlega stórar.

Heimasæturnar buðu systkinunum með sér í sund og það var ekkert smá gaman. Þar var mikið fjör, síðan komið seint heim, allir þreyttir eftir viðburðaríkan dag.